Segir Framtakssjóðinn draga lappirnar við að koma eignum á markað

Greining Arion banka sakar Framtakssjóð Íslands um að draga lappirnar í því að koma eignum sínum á markað eins og að var stefnt.

Framtakssjóðurinn er í meirihlutaeigu lífeyrissjóðanna og á gífurlegar eignir sem hann er þegar byrjaður að hagnast um milljarða króna á. Skýrt dæmi um hagnaðinn er nýleg sala sjóðsins á 10% hlut í Icelandair.

Í Markaðspunktum greiningar Arion banka segir að Framtakssjóðurinn sé stórveldi í íslensku fjármálalífi í dag þar sem áskriftarloforð í hann nemi 54 milljörðum króna. Raunar er ekki búið að innleysa nema þriðjunginn af þeim loforðum. Sjóðurinn gegni því lykilhlutverki í að koma hlutabréfamarkaði landsins á réttan spöl að nýju en lítil merki séu um áhuga stjórnenda sjóðsins á slíku.

Meðal eigna Framtakssjóðs sem auðveldlega mætti skrá á markað má nefna að sjóðurinn á enn 19% í Icelandair. Þar að auki á hann 81% í Icelandic Group, 79% í Skýrr, 79% í Vodafone, Plastprent að fullu og 49,5% í Promens. Þá á sjóðurinn Húsasmiðjuna að fullu en hún er í söluferli sem og 55% í olíufélaginu N1.