Dohop semur við SEA á Ítalíu

Íslenska hugbúnaðarfyrirtækið Dohop hefur gert samning við SEA á Ítalíu, rekstraraðila Malpensa flugvallarins í Mílanó, um þróun og rekstur sérsniðnar flugleitar fyrir vef flugvallarins. Þetta kemur fram í fréttatilkynningu frá Dohop.

Tæplega 19 milljón farþegar fóru um Malpensa flugvöll á síðasta ári, en til samanburðar fóru um 1,8 milljónir farþega um Keflavíkurflugvöll á sama tímabili.

„Við erum afar hrifnir af vörunni,“ segir Giulio De Metrio, framkvæmdastjóri SEA, í tilkynningu. Kristján Guðni Bjarnason, framkvæmdastjóri Dohop, segir ánægju ríkja með samstarfið. "Við eigum mikilvægan þátt í því að gera hugmyndir þeirra um Malpensa sem öflugan tengiflugvöll að veruleika," segir Kristján Guðni.

Dohop var stofnað árið 2004 og er með aðsetur í Reykjavík. Hjá fyrirtækinu starfa átta starfsmenn við þróun, rekstur og markaðssetningu leitarvélarinnar Dohop.