Minnkandi sala á fötum og skóm í október

Velta í dagvöruverslun dróst saman um 1,9% á föstu verðlagi í október miðað við sama mánuð í fyrra og jókst um 2,9% á breytilegu verðlagi. Leiðrétt fyrir árstíðabundnum þáttum dróst velta dagvöruverslana í október saman um 0,1% frá sama mánuði í fyrra. Verð á dagvöru hefur hækkað um 4,8% á síðastliðnum 12 mánuðum.

Sala áfengis dróst saman um 11,3% í október miðað við sama mánuð í fyrra á föstu verðlagi og um 7,8% á breytilegu verðlagi. Leiðrétt fyrir árstíðabundnum þáttum nam samdráttur í veltu áfengis í október 3,3% frá sama mánuði í fyrra.  Verð á áfengi var 3,9% hærra í október síðastliðnum en í sama mánuði í fyrra.

Fataverslun dróst saman um 19,6% í október miðað við sama mánuð í fyrra á föstu verðlagi og um 18,6% á breytilegu verðlagi á sama tímabili. Leiðrétt fyrir árstíðabundnum þáttum dróst velta fataverslunar í október saman um 16,4% frá sama mánuði árið áður. Verð á fötum var 1,3% lægra en í sama mánuði fyrir ári.

Velta skóverslunar dróst saman um 25,1% í október á föstu verðlagi og um 22,7% á breytilegu verðlagi miðað við sama mánuð í fyrra. Verð á skóm hækkaði um 3,3% frá september í fyrra.

Velta húsgagnaverslana jókst um 5,1% í október frá sama mánuði í fyrra á föstu verðlagi og um 8,6% á breytilegu verðlagi. Verð á húsgögnum var 3,3% hærra í október síðastliðnum miðað við sama mánuð í fyrra. Velta sérverslana með rúm jókst um 10,3% frá sama mánuði í fyrra á föstu verðlagi. Velta í sölu skrifstofuhúsgagna dróst saman um 0,1% í október síðastliðnum samanborið við sama mánuð í fyrra á föstu verðlagi.

Sala á raftækjum í október dróst saman um 1,9% á föstu verðlagi og um 4,8% á breytilegu verðlagi. Verð á raftækjum var 2,9% lægra en í október 2010.

Almennt varð samdráttur í verslun í október, þó mismikill eftir tegundum. Þannig varð afar lítil raunbreyting í dagvöruverslun í síðasta mánuði en hins vegar vekur athygli hve fataverslun dróst mikið saman. Fataverslun hefur reyndar minnkað töluvert undanfarna mánuði sem er ekki í takt við þróun á annarri tegund sérvöruverslunar. Það sem af er þessu ári er sala á fötum að raunvirði 8,7% minni en á sama tímabili í fyrra. Fatakaupmenn nefna ýmsar ástæður fyrir þessu, meðal annars meiri nýtni á fötum, merkjavörur seljist minna en áður og að landsmenn kaupi föt í auknum mæli erlendis.

Ein ástæða þess að verslun var almennt minni í október síðastliðnum heldur en í sama mánuði í fyrra var að á þessu ári voru fjórir föstudagar í október en í fyrra voru þeir fimm. Þó veltutölur hafi verið leiðréttar með tilliti til þessa dagamismunar varð samt einhver samdráttur í öllum tegundum verslunar nema í húsgagnaverslun, þar sem veltan jókst. Athyglisvert er að verslun með rúm hefur aukist um 17,7% á síðustu þremur mánuðum miðað við sama tímabil í fyrra að raunvirði.

Þrátt fyrir samdrátt í verslun í október virðist sem einkaneysla haldi áfram að aukast þegar horft er til lengra tímabils. Þannig nam raunhækkun á innlendri greiðslukortanotkun frá janúar til september síðastliðinn 4,3%. Velta á greiðslukortum Íslendinga erlendis jókst mun meira en kortavelta útlendinga hér á landi fyrstu níu mánuði ársins. Greiðslukortanotkun Íslendinga erlendis var 22% meiri en á sama tíma í fyrra á meðan kortanotkun útlendinga hér á landi jókst um 14,6%.