Verja 30 milljörðum í skóla- og frístundamál

Heildarútgjöld í fjárhagsáætlun Reykjavíkurborgar nema 62,4 milljörðum króna á næsta ári, samkvæmt fjárhagsáætlun sem kynnt var í dag. Samkvæmt endurskoðaðri áætlun fyrir árið í ár nema heildarútgjödl 58,8 milljörðum og því er ljóst að þau hækka um tæpa 3,6 milljarða króna. Stærsti málaflokkurinn er sem fyrr skóla- og frístundasvið en rétt rúmlega 30 milljörðum verður varið í hann á næsta ári, samkvæmt áætluninni. Tæpir 11, 6 milljarðar renna til velferðarsviðs og fimm milljarðar renna til íþrótta- og tómstundasviðs.

Í frumvarpinu, sem Jón Gnarr borgarstjóri, mælti fyrir í dag kemur fram að jafnvægi hafi verið náð í rekstri Reykjavíkurborgar eftir tímabil þriggja ára niðurskurðar. Tekist hafi að ná utan um erfiða fjárhagsstöðu borgarinnar og fyrirtækja hennar. Þar kemur jafnframt fram að nauðsynlegar aðgerðir sem farið hafi verið í til að bæta fjárhag Orkuveitu Reykjavíkur hafi eytt óvissu og skilað sér nú í umtalsvert meira öryggi fyrir rekstur Reykjavíkurborgar. Niðurgreiðsla skulda Orkuveitunnar sé þegar hafin.

Hanna Birna Kristjánsddóttir, oddviti borgarstjórnarflokks Sjálfstæðisflokksins, gagnrýnir frumvarpið. Hún segir að meirihlutinn ætli að fá 500 milljónir vegna gjaldskrárhækkana frá borgarbúum á árinu 2012. Þetta sé gert þrátt fyrir það að ekki sé um tekjuskerðingu að ræða hjá borginni heldur aukist skatttekjur þvert á móti um 4,2 milljarða á milli ára. Frá í fyrra hafi skatttekjur borgarinnar aukist um 15% og samt sjáist ekki fyrir endann á gjaldskrárhækkunum og skattheimtu hjá meirihlutanum.