Pétur Blöndal kynnir nýtt kvótafrumvarp

Pétur Blöndal alþingismaður hefur mótað sitt eigið kvótafrumvarp. Í tölvupósti sem hann sendi á alla þingmenn á Alþingi í kvöld auglýsir hann eftir meðflutningsmönnum að frumvarpinu.

Samkvæmt frumvarpinu er gert ráð fyrir að öllum heimildum til að veiða úr nytjastofnum við Íslands strendur verði dreift á alla íbúa landsins þannig að þeim verði heimilt að hagnýta þær í 40 ár frá úthlutunardegi. Þetta verði framkvæmt á þann hátt að 2,5% hluta samanlagðrar aflahlutdeildar verði dreift á jafnan hátt til allra íbúa landsins á hverju almanaksári. Þar með verði hverjum íbúa gert heimilt að veiða hlutdeild sína í 40 ár að öðrum skilyrðum uppfylltum. Þeirri aflahlutdeild sem ekki hefur verið úthlutað í fyrstu úthlutun eftir gildistöku laganna er úthlutað á næstu 39 árum. Að gildistíma úthlutunar hvers aflahlutdeildarhluta er hlutanum úthlutað að nýju til 40 ára.

Samkvæmt frumvarpi Péturs verður aflahlutdeildin framseljanleg að hluta eða öllu leyti, veðsetjanleg og ekki bundin við skip eða þjóðerni (þ.e. útlendingar mega kaupa þennan tímabundna kvóta). Allir pottar verða aflagðir sem og sérstök úthlutun til strandveiða. Öllum sérstökum kvöðum verður aflétt af útgerðinni og henni fengin sömu réttindi og skyldur og gilda um önnur fyrirtæki. T.d. verður auðlindagjaldi aflétt.