Viðskiptaráðherra bregst við hættum á peningaþvætti og hryðjuverkum

Árni Páll Árnason, efnahags- og viðskiptaráðherra, hefur lagt fram lagafrumvarp um aðgerðir gegn hryðjuverkum og peningaþvætti.

Úttekt var gerð á stöðu Íslands gagnvart aðgerðum gegn peningaþvætti og fjármögnun hryðjuverka árið 2006, eftir því sem fram kemur í greinargerð með frumvarpinu. Tilgangur úttektarinnar er að kanna hvort farið sé eftir tilmælum sem alþjóðlegur framkvæmdahópur gegn peningaþvætti og hryðjuverkum hefur sett.

Í úttektinni kom fram að Ísland hafði einungis uppfyllt að hluta til eða alls ekki uppfyllt 26 af 49 tilmælum sem voru sett. Ísland var hins vegar talið hafa uppfyllt 22 tilmælanna en eitt af hinum 49 tilmælum þótti ekki hafa átt við.

Í frumvarpi Árna Páls felast tillögur um lagabreytingar í samræmi við ábendingar sem alþjóðlegi framkvæmdahópurinn sendi frá sér eftir úttektina.