Bitist um 6500 samninga

Aðalmeðferð fór fram í máli Smákrana gegn Lýsingu vegna svokallaðra fjármögnunarleigusamninga sem gerður var fyrir bankahrun. Smákranar telja að um hafi verið að ræða gengistryggt íslenskt lán, sem sé ólöglegt með hliðsjón af þeim dómum sem hafa fallið í Hæstarétti.

Hæstiréttur komst að þeirri niðurstöðu fyrir fáeinum vikum að fjármögnunarleigusamningur sem Kraftvélaleigan gerði við Íslandsbanka hafi verið ólöglegur. Íslandsbanki og SP fjármögnun, sem nú er hluti af Landsbankanum, telja að dómurinn hafi fordæmisgildi fyrir aðra samninga sem lánastofnanirnar gerðu. Lýsing telur hins vegar að dómurinn hafi ekki fordæmisgildi fyrir sína samninga.

Einar Hugi Bjarnason, lögmaður Smákrana, segir að engar málsástæður hafi komið fram í máli lögmanns Lýsingar við aðalmeðferðina í dag sem varpi neinu ljósi á það hvernig samningar Lýsingar voru frábrugnir samningum Íslandsbanka. Árni Ármann Árnason, lögmaður Lýsingar, vildi ekki tjá sig um málsástæður Lýsingar þegar hann var spurður út í þær í dag.

Málið hefur mikla þýðingu því að Lýsing gerði alls 6500 fjámögnunarleigusamninga við viðskiptavini sína.