Vilja fá Bakkaskemmu undir sjávarútvegsklasa

Nokkrir aðilar hafa lýst yfir áhuga sínum á að reka sjávarútvegsklasa í Bakkaskemmu á Grandagarði. Um yrði að ræða þróun og framleiðslu á tækjum og búnaði fyrir útgerðir og fiskvinnslur.

Fjallað er um málið á vefsíðu Faxaflóahafna en Bakkaskemma er í eigu hafnanna.  Húsið var byggt af Reykjavíkurhöfn árið 1967, sem vöruskemma.

Á meginhluta efri hæðar hússins eða á alls um 2.200 m2, var um árabil starfsemi Hampiðjunnar, sem nú er með aðstöðu sína í Sundahöfn.  Á síðasta ári var efri hæðin lánuð Hugmyndahúsi Háskólanna undir starfsemi sem þau kölluðu Útgerðina en þar var unnið að ýmis konar listtengdum verkefnum.

Fyrir liggur að endurnýja þarf ýmsa hluti innan dyra svo sem vatnslagnir, rafmagn, glugga og fleira og er ráðgert að sú vinna fari fram á árinu 2012.