Ríkið á inni 67 milljarða í ógreiddum arðgreiðslum frá bönkunum

Daníel Svavarsson, forstöðumaður Hagfræðideildar Landsbankans kemst að þeirri niðurstöðu í grein sem hann ritar á Umræðuvef bankans, að ríkið eigi inni sem svarar 67 milljörðum króna í ógreiddar arðgreiðslur miðað við hlutafjáreign sína í stóru bönkunum þremur, Landsbankanum, Arion banka og Íslandsbanka.

Í grein Daníels kemur einnig fram að staða ríkissjóðs sé mun rýmri en oft sé látið í veðri vaka, ef tillit sé tekið til þess arðs sem eignarhlutur ríkisins í bönkunum hefur skilað.

Grein Daníels er ein þeirra sem fyrst birtast á nýjum umræðuvef Landsbankans sem opnaður var í gær. Meðal annarra höfunda sem þegar hafa birt greinar á vefnum má nefna þá Joseph Stiglitz og Nouriel Roubini auk Steinþórs Pálssonar bankastjóra sem fjallar um ástæður þess að bankinn stígur nú þetta skref.

Grein Daníels Svavarssonar má lesa hér í heild sinni.