Icelandic Group selur eignir í Bandaríkjunum fyrir 27 milljarða

Icelandic Group hefur lokið sölu á eignum fyrirtækisins í Bandaríkjunum en kaupandi að þeim er kanadíska félagið High Liner Foods, sem er skráð á markað markað þar í landi.

Samkvæmt heimildum Vísis nemur söluverðið á milli 220 til 230 milljónum dollara, eða sem nemur um 27 milljörðum króna. Sé mið tekið af EBITDA-framlegð rekstursins, sem var um 23,7 milljónir dollara á síðasta ári, þá er söluverðið um níföld sú framlegð.

Samkvæmt heimildum Vísis lagði Framtakssjóður Íslands, eigandi 81% hlutafjár í Icelandic Group, á það áherslu að íslenskir framleiðendur hafi áfram aðgang að Bandaríkjamarkaði þrátt fyrir þessa breytingu á eignarhaldi. Þetta var meðal annars gert með sérstökum samningi sem á að tryggja dreifingu og aðgang að markaði.

Vörumerkið Icelandic Seafood verður áfram í eigu íslenska reksturs Icelandic Group, en gerður verður sérstakur samningur um notkun þess í Bandaríkjunum.