Íslandsbanki kemur að fjármögnun nýrra gámaskipa

Eimskipafélag Íslands hefur fest kaup á tveimur nýjum gámaskipum og hefur gert samning um smíði þeirra í Kína. Íslandsbanki mun fjármagna allt að 30% af smíði skipanna á skipatímanum en áætlaður kostnaður við smíðina er um 5,8 milljarðar íslenskra króna, að því er segir í tilkynningu frá Íslandsbanka.

Skipin, sem eru þýsk hönnun, eru hvort um sig 875 gámaeiningar að stærð og þar af eru tenglar fyrir 230 frystigáma. Burðageta skipanna er um 12.000 tonn, lengd 140,7 metrar og breidd 23,2 metrar. Eimskipafélagið gerir ráð fyrir að með tilkomu skipanna muni skapast fleiri störf fyrir sjómenn en félagið hefur haft það að leiðarljósi að manna eigin gámaskip með íslenskum áhöfnum. Gert er ráð fyrir að skipin verði afhent félaginu á fyrri hluta ársins 2013, að því er segir í tilkynningu.