Lífeyrissjóðirnir út úr Búvöllum

Lífeyrissjóðir sem voru hluti af Búvöllum slhf. hafa leyst til sín hluti sína og halda nú á þeim í eigin nafni. Búvellir voru stofnaðir utan um hóp fjárfesta sem keypti 44% hlut í smásölurisanum Högum fyrir um 5,4 milljarða króna í tveimur atrennum fyrr á þessu ári. Stærsti lífeyrissjóðurinn sem klýfur sig nú frá hopnum er Gildi, sem á nú 8,6% hlut í eigin nafni, og Festa, sem á 3,7%.

Fréttablaðið greindi frá því í byrjun nóvember að lífeyrissjóðirnir myndu fara út úr Búvöllum. Tilkynning þess efnis var síðan send til Kauphallarinnar í gærkvöldi.

Eftirstandandi hluthafar Búvalla verða fjórir. Þeir eru Hagamelur ehf. (í eigu Árna Haukssonar, Hallbjörns Karlssonar, Sigurbjörns Þorkelssonar og TM), SÍA I fagfjárfestasjóður sem rekinn er af Stefni, Miranda ehf. (í eigu Berglindar Jónsdóttur) og Draupnir fjárfestingafélag (í eigu Jóns Diðriks Jónssonar). Eignarhlutur Búvalla í Högum eftir brottför lífeyrissjóðanna verður 20,9%.

Hagar verða skráðir á markað í byrjun desember. Þá ætlar Arion banki að selja 20-30% hlut í félaginu í tvískiptu útboði.