Peningamál: Staðfesting á efnahagsbata

„Nýjustu hagtölur og spá Seðlabankans staðfesta að efnahagsbatinn hefur haldið áfram, þrátt fyrir að það dragi úr hagvexti í heiminum og óvissa hafi aukist." Þetta kemur fram í nýjustu Peningamálum Seðlabanka Íslands, sem komu út í dag. Eins og greint var frá í morgun ákvað Peningastefnunefnd Seðlabanka Íslands að hækka vexti.



Í Peningamálum kemur jafnframt fram að veruleg óvissa sé um það hvaða feril nafnvaxta þurfi til þess að „ná verðbólgumarkmiðinu".

Orðrétt segir: „Gert er ráð fyrir að hagvöxtur verði nokkru meiri í ár og á næsta ári en spáð var í ágúst og að verðbólga verði heldur minni á næstu misserum sakir sterkara gengis krónunnar og minni innfluttrar verðbólgu.

Veruleg óvissa ríkir um þann feril nafnvaxta sem þarf til þess að ná verðbólgumarkmiðinu. Í ljósi efnahagshorfa, áframhaldandi styrkingar gengis krónunnar og hugsanlega óhagstæðrar alþjóðlegrar efnahagsþróunar virðist núverandi vaxtastig um það bil við hæfi á komandi mánuðum.

Horft lengra fram á veginn verður hins vegar nauðsynlegt að draga úr núverandi slaka peningastefnunnar eftir því sem efnahagsbatanum vindur fram og dregur úr slaka í þjóðarbúskapnum. Að hve miklu leyti þessi aðlögun á sér stað með hærri nafnvöxtum fer eftir framvindu verðbólgunnar."