Ekkert útilokar kennitölusöfnun við söluna á Högum

Bankarnir eru tregir til að selja eignir í gegnum Kauphöllina. Forstjóri Kauphallarinnar vonast til að salan á Högum marki tímamót en 20-30 prósenta hlutur verður seldur í desember og býðst almenningi að kaupa hlutabréf fyrir hundrað þúsund krónur að lágmarki. Ekkert í gildandi reglum útilokar svokallaða kennitölusöfnun þegar hlutabréfin í Högum verða seld.

Hagar eru fyrsta fyrirtækið sem verður selt í gegnum Kauphöllina eftir bankahrunið, en dótturfélag Arion banka hyggst selja 20-30 prósenta hlut í fyrirtækinu í gegnum Kauphöllina í desember næstkomandi. Páll Harðarson, forstjóri Kauphallarinnar, segir þetta afar jákvæð tíðindi og marki í raun endurreisn hlutabréfamarkaðarins hér á landi.

Einhverjum gæti þótt dapurlegt að þótt þrjú ár séu frá hruni sé ekki búið að selja eitt einasta fyrirtæki í gegnum Kauphöllina þótt bankarnir hafi tekið yfir eignir í massavís eftir hrunið.

Menn treysta ekki markaðsleiðinni

„Mögulega er vantrú á þessari leið. Að menn treysti ekki á markaðsleiðina. Það þykir mér miður því ég held að hún sé fær og væri mjög æskileg í fleiri tilfellum,“ segir Páll Harðarson, forstjóri Kauphallarinnar.

Hann segir að þetta sé besta leiðin til að fá eðlilega verðmyndun á félög. Þá sé þetta einnig góð leið til að auka þátttöku almennings í atvinnulífinu sem sé algjörlega nauðsynlegt til að skapa sátt um það.

Þótt bankarnir hafi verið tregir til að selja fyrirtæki gegnum Kauphöllina vonast Páll til þess að salan á Högum marki tímamót. Almenningi mun standa til boða að kaupa hlut og nemur lágmarksfjárhæðin 100 þúsund krónum að markaðsvirði.

Veistu til þess að það verði búið þannig um hnútana að komið verði í veg fyrir að einstakir fjársterkir aðilar geti keypt stóra hluti t.d með framsali frá einstaklingum með aðferð sem kölluð hefur verið „kennitölusöfnun“ ? „Það er nú þannig að þegar félag fer á markað þá er frjálst framsal hluta á markaði heimilt. Þannig að í sjálfu sér kemur ekkert í veg fyrir að aðilar minnki hlut sinn eða auki við hann, en þó ber að geta þess að hér gilda yfirtökureglur þannig að á þessu eru mjög ákveðin takmörk,“ segir Páll.

Forstjóri Kauphallarinnar vonast til þess að innan tíðar skapist að nýju blómlegur markaður með hlutabréf í Kauphöllinni. Hann segist finna fyrir miklum áhuga hjá fjárfestum. „Ekki síst lífeyrissjóðunum sem þurfa á svona markaði að halda. Það er mikil uppsöfnuð þörf og við finnum jafnan fyrir miklum áhuga hjá fyrirtækjunum sjálfum. Þannig að ég er mjög bjartsýnn,“ segir Páll. thorbjorn@stod2.is