Úr 3,6 milljörðum í 8,1 milljarð

Miðað við markaðsgengi Icelandair Group í dag er hlutur Framtakssjóðsins í félaginu ríflega 8,1 milljarða virði. Framtakssjóðurinn keypti 30% hlutinn á 3,6 milljarða. Hagnaðurinn er því umtalsverður. Tíu prósent hlutur, sem Icelandair tilkynnti um í morgun að yrði seldur, er virði um 2,7 milljarða króna.

Framtakssjóðurinn er stærsti eigandi Icelandair. Næstu þrír á eftir honum eru Íslandsbanki með 20,6% hlut, Lífeyrissjóður verzlunarmanna á 12,7% og Lífeyrissjóður starfsmanna ríkisins rúmlega 6%. Allir þessari aðilar hafa hagnast mikið á sínum hlutum frá því þeir voru skráðir á genginu 2,5.

Gengi bréfa í Icelandair hefur hækkað um 0,55% í dag, líkt og sjá má á viðskiptavef Vísis.