Arion vann milljarðamál í héraðsdómi

Ice Capital ehf, sem áður hét Sund ehf, hefur verið dæmt til að greiða Arion banka því sem nemur 3,7 milljörðum króna vegna láns sem félagið tók hjá Kaupþingi. Málið er rakið til þess að árið 2004 gerði Sund samning við Kaupþing Búnaðarbanka um eignastýringu.

Í október 2006 var svo gerður lánssamningur milli Sunds og bankans þar sem kveðið var á um Sund tæki að láni þrjá milljarða króna. Helmingur lánsins væri í íslenskum krónum en hinn helmingurinn sambland af bandaríkjadollurum, sterlingspundum, jenum, frönkum og evrum.

Lánið var ógreitt í lok árs 2009 og var þá ákveðið að stefna Sundi. Sund neitaði að greiða meðal annars vegna þess að gengistryggð lán væru ólögleg. Héraðsdómur Reykjavíkur komst í dag að þeirri niðurstöðu að lánið hefði verið erlent lán, en ekki íslenskt gengistryggt lán. Sundi bæri því að greiða lánið til baka, samkvæmt skilmálum sem gerðir voru þegar lánið var tekið.