Fimm milljarða króna aukakvóti

Jón Bjarnason sjávarútvegs- og landbúnaðarráðherra hefur ákveðið í framhaldi af ráðgjöf Hafrannsóknarstofnunarinnar 3. nóvember síðastliðinn að hækka heildaraflamark í íslenskri sumargotssíld um 40 þúsund tonn. Fyrr á þessu hausti úthlutaði ráðherra 5 þúsund tonnum í sama aflamarki.

Samtals er því heildaraflamark í sumargotssíld 45 þúsund tonn. Þar af fara 2 þúsund tonn í sérstaka leiguúthlutun til smábáta. Af þessum 2000 tonnum hafa 350 tonn þegar verið leigð út. Samkvæmt upplýsingum Vísis nemur útflutningsverðmæti viðbótarkvótans yfir fimm milljörðum króna.

Rannsóknir Hafrannsóknarstofnunarinnar við Suður- og Suðausturland síðasta sumar og í fyrrahaust sýna að síld þar er minna sýkt en síld við Vesturland og fullorðin síld er blönduð smásíld. Í ljósi þessa er ákveðið að vernda síld á þessum svæðum. Veiði á sumargotssíld er til bráðabirgða takmörkuð við Faxaflóa og Breiðafjörð eða svæði sem nær frá Garðskagavita að Bjargtöngum.