Almenningur nýtur ekki góðs af hækkun á raungengi krónunnar

Raungengi krónunnar heldur áfram að styrkjast en almenningur virðist ekki njóta þess sem skyldi.

Raungengi krónunnar styrktist um 1,3% í október og var það þriðji mánuðurinn í röð sem gengið styrkist. Raungengið í dag hefur ekki verið sterkara síðan fyrir síðustu áramót.

Fjallað er um málið í Morgunkorni greiningar Íslandsbanka og þar kemur fram að almenningur virðist ekki njóta þessarar hækkunar á raungenginu sem skyldi. Þannig segir í Morgunkorninu að miðað við vísitölu neysluverðs hefur verðlag hér á landi hækkað um rétt tæp 5% frá því í desember á síðasta ári og fram til síðasta mánaðar. Af þessu megi sjá að verðlag hér á landi hefur verið að hækka  nokkuð umfram verðlag erlendis á sama tíma.

Gengið á langt í land með að ná langtímameðaltali sínu og er raunar 22% undir því í dag. Væri krónan búin að ná þessu meðaltali kostaði dollarinn innan við 90 krónur og dönsku krónuna væri hægt að kaupa á 16 krónur.