Gæti hagnast um tæpa 5 milljarða á Icelandair

Hagnaður Framtakssjóðs Íslands af kaupunum á tæplega 30% hlut í Icelandair í fyrra nemur milljörðum króna.

Fyrir 10% hlut í Icelandair fékk Framtakssjóðurinn 2,7 milljarða króna. Í fyrra keypti sjóðurinn tæplega 30% í flugfélaginu fyrir 3,6 milljarða króna. Ef sjóðurinn fær sama verð fyrir þann hlut sem hann á eftir í Icelandair mun hann hagnast um tæpa 5 milljarða króna í heild á þessum kaupum.

Í tilkynningu frá sjóðnum segir að það hafi verið breiður hópur fjárfesta sem keypti fyrrgreindan 10% hlut. Samkvæmt heimildum Fréttastofu var þarna að hluta til um lífeyrissjóði að ræða. Segja má að þar hafi þeir verið að kaupa af sjálfum sér því Framtakssjóðurinn er í eigu lífeyrissjóðanna.

Salan á hlutnum í Icelandair er enn eitt merkið um að líf sé að færast í Kauphöllina að nýju eftir döpur ár frá hruninu haustið 2008. Þannig eru Hagar á leið í Kauphöllina og fleiri félög eru að þoka sér í átt að skráningu á þessum markaði.