Glitnir krefst þess að Jón Ásgeir greiði allan málskostnað

Þrotabú Glitnis banka krefst þess að Jón Ásgeir Jóhannesson greiði allan þann málskostnað sem honum ber að greiða í tengslum við frystingu á eignum hans í London. Heildarkrafa Glitnis gagnvart Jóni Ásgeiri Jóhannessyni er 604 þúsund pund, liðlega 110 milljónir króna, en hann hefur nú þegar greitt um 150 þúsund pund, liðlega 27 milljónir króna. Aðalmeðferð vegna þessa máls fór fram í Héraðsdómi Reykjavíkur í morgun.

Ágreiningur er uppi milli Glitnis og Jóns Ásgeirs um hvort fullnaðaruppgjör vegna þessa málskostnaðar hefur fram eða ekki, miðað við samning þeirra á milli. Glitnir segir Jón Ásgeir skulda bankanum en Jón Ásgeir telur ekki svo vera, samkvæmt upplýsingum frá Hróbjarti Jónatanssyni hrl., lögmanni Glitnis, og Einari Þór Sverrissyni hrl., lögmanni Jóns Ásgeirs.

Jón Ásgeir fékk á sínum tíma heimild til þess að selja kyrrsetta eign upp í þessa skuld, en þá keypti móðir hans hús að Laufásvegi 69 af honum á um 90 milljónir króna.

Frystingin á eignum Jóns Ásgeirs tengdist skaðabótamáli Glitnis gegn Jóni Ásgeiri og sex öðrum fyrrverandi stjórnendum og hluthöfum bankans fyrir dómstóli í New York. Því máli var vísað frá en að því er slitastjórn Glitnis hefur upplýst er hún með frekari mál í undirbúningi.