Lífeyrissjóðir keyptu hluti í Icelandair af sjálfum sér

Sá breiði hópur fjárfesta sem keyptu 10% hlut í Icelandair af Framtakssjóði Íslands (FSÍ) er að mestu skipaður eigendum sjóðsins. Samkvæmt heimildum Fréttablaðsins voru níu lífeyrissjóðir sem eru á meðal eigenda FSÍ hluti af hópnum. Þeirra á meðal er Lífeyrissjóður verslunarmanna, sem keypti 2,5% og á nú 14,5% hlut, og Gildi lífeyrissjóður, sem keypti um 1,1% hlut.

Stærsti eigandi FSÍ, Landsbanki Íslands, keypti ekki hlut. Hann mun hins vegar fá um 745 milljónir króna greiddar vegna sölunnar, í samræmi við 27,6% eignarhlut bankans í FSÍ.

FSÍ tilkynnti í gærmorgun að sjóðurinn hefði selt 10% af eignarhlut sínum í Icelandair á 2,7 milljarða króna og að kaupendur væru breiður hópur fagfjárfesta. Bréfin höfðu þá ávaxtast um 120% frá því að þau voru keypt í tveimur útboðum á árinu 2010 á genginu 2,5. Samtals fjárfesti FSÍ í Icelandair fyrir 3,6 milljarða króna á síðasta ári. Sjóðurinn á enn 19% hlut í Icelandair sem metinn er á um 5,1 milljarða króna miðað við sölugengið í gær, sem var 5,42 krónur á hlut.

Andvirði sölunnar rennur beint til lífeyrissjóðanna og annarra eigenda FSÍ í samræmi við skilmála sjóðsins. Þeir gera ráð fyrir því að allir eigendur FSÍ fái greitt út í samræmi við eignarhlut sinn. Það þýðir að Landsbankinn, sem keypti ekki hlut, mun fá um 745 milljónir króna greiddar vegna sölunnar. Hlutaféð var selt í áskriftasöfnun.

Eftir söluna verður FSÍ ekki lengur stærsti eigandi Icelandair heldur Íslandsbanki, sem á 20,6% hlut. Stærstu eigendur FSÍ eru Landsbanki Íslands með 27,6% hlut, Lífeyrissjóður verslunarmanna með 19,9% hlut, Gildi lífeyrissjóður með 10,4% hlut, Sameinaði lífeyrissjóðurinn með 7,7% hlut og Lífeyrissjóður starfsmanna ríkisins með 7,4% hlut.

Icelandair hefur gengið vel frá því að félagið fór í gegnum fjárhagslega endurskipulagningu á síðasta ári. Í henni var hlutafé aukið, skuldum breytt í nýtt hlutafé og vaxtaberandi skuldir lækkaðar með yfirfærslu og sölu á tilteknum eignum sem voru ekki hluti af kjarnastarfsemi Icelandair. Samtals lækkuðu vaxtaberandi skuldir félagsins um tæpa 14 milljarða við þá aðgerð. Icelandair hagnaðist um 4,7 milljarða króna á fyrstu níu mánuðum þessa árs.