Þórður Gunnarsson ráðinn til Júpiter

Þórður Gunnarsson hefur hafið störf hjá Júpiter rekstrarfélagi, en hann er fjórði starfsmaður félagsins. Meðal þeirra starfa sem Þórður mun sinna hjá Júpíter eru fjárfestatengsl auk greininga og rannsókna.

Í tilkynningu segir að ráðningin er að sama skapi liður í því að efla upplýsingagjöf félagsins til viðskiptavina.

Þórður hefur lokið grunnnámi í hagfræði frá HÍ og leggur nú stund á hlutanám í orkuhagfræði á meistarastigi við BI Handelshoyskolen í Osló. Áður en Þórður gekk til liðs við Júpíter starfaði hann um tveggja ára skeið á viðskiptaritstjórn Morgunblaðsins, 2009-2011, og þar áður á Viðskiptablaðinu á árunum 2007-2008.

Júpíter rekstrarfélag sérhæfir sig í stýringu fjármuna og starfrækir fjóra verðbréfasjóði og einn fagfjárfestasjóð. Viðskiptavinir félagsins eru meðal annars lífeyrissjóðir, tryggingafélög, eignastýringarsvið fjármálafyrirtækja, önnur rekstrarfélög og efnameiri einstaklingar. Eignir í stýringu Júpíters nema um 10,5 milljörðum króna.