Lúxushótel auka gjaldeyristekjur um 18 milljarða á ári

Greining Arion banka segir að möguleiki sé á að auka gjaldeyristekjur af ferðamönnum um 18 milljarða á ári í framtíðinni. Þetta er háð því að byggt verði lúxushótel við hlið Hörpu og að ráðist verði í hótelbyggingar Kínverjans Huangs Nubo á Grímsstöðum á fjöllum og í Reykjavík.

Greiningin telur að gjaldeyristekjur af þessum framkvæmdum meðan á þeim stendur muni nema á bilinu 11 til 13 milljörðum króna. Þetta kemur fram í Markaðspunktum greiningarinnar. Þar segir að þessi hótel muni þar að auki skapa um 1.500 varanleg störf hér innanlands.

Í Markaðspunktunum segir að erlend fjárfesting í ferðaþjónustu á næstu árum myndi brúa að hluta fyrirsjáanlegt gat í fjárfestingu á árunum 2012-2014. Ætla megi að fjárfestingarnar skapi um 1700-2100 ársverk á framkvæmdatíma. Samkvæmt þessu mati yrðu afleidd störf um helmingur beinna starfa.

Samkvæmt upplýsingum frá World Tourist Organization má áætla að þörf sé á tveimur einstaklingum fyrir hvert herbergi á 5 stjörnu hóteli. Því myndu skapast um 1500 endanleg störf  ef byggð yrðu 750 herbergi í hæsta gæðaflokki.

„Ætla má að um 35-40% af fjárfestingu í hágæða hótelum séu vinnulaun. Því má áætla að vinnuliðurinn einn og sér skapi á bilinu 11-13 milljarða króna í gjaldeyristekjur á meðan framkvæmdum stendur,“ segir í Markaðspunktunum.

„Miðað við 750 hótelherbergi og að hingað komi í auknum mæli ferðamenn sem eyða meira en hinn almenni ferðamaður má skjóta á að hér gætu skapast 18 milljara kr. í gjaldeyristekjur á ári hverju eftir að framkvæmdum lýkur.“