Gjaldþrot þrefaldast milli ára í september

Í september 2011 voru 172 fyrirtæki tekin til gjaldþrotaskipta samanborið við 57 fyrirtæki í september 2010. Fjöldi þeirra hefur því þrefaldast milli ára í september.

Þetta kemur fram á vefsíðu Hagstofunnar. Þar segir að eftir atvinnugreinum voru flest gjaldþrot í byggingarstarfsemi og mannvirkjagerð. Fyrstu 9 mánuði ársins 2011 er fjöldi gjaldþrota 1.122 sem er 65% aukning frá sama tímabili árið 2010 þegar 680 fyrirtæki voru tekin til gjaldþrotaskipta.

Í september 2011 voru skráð 150 ný einkahlutafélög (ehf) samanborið við 110 einkahlutafélög í september 2010. Eftir atvinnugreinum voru flest einkahlutafélög skráð í heild- og smásöluverslun, viðgerðir á vélknúnum ökutækjum.

Heildarfjöldi nýskráðra einkahlutafélaga er 1.221 fyrstu 9 mánuði ársins og hefur nýskráningum fækkað um 1% frá sama tímabili árið 2010 þegar 1.233 ný einkahlutafélög voru skráð.