Ráðinn viðskiptastjóri hjá Microsoft Ísland

Sigurjón Birgir Hákonarsson tölvunarfræðingur hefur verið ráðinn til starfa sem viðskiptastjóri stærri fyrirtækja hjá Microsoft Ísland. Hann er með meistaragráðu í tölvunarfræðum frá Háskóla Íslands og yfir 15 ára starfsreynslu í upplýsingatæknigeiranum. Þar af hefur hann um fimm ára stjórnunarreynslu.

Sigurjón starfaði hjá Skýrr við viðskiptaþróun með áherslu á fjármálamarkaðinn. Þar áður var hann forstöðumaður hugbúnaðarlausna á upplýsingatæknisviði Íslandsbanka. Hann hefur einnig stundað kennslu í tölvunarfræðum og verkefnastjórnun. Sigurjón er kvæntur Arndísi Thorarensen og eiga þau tvö börn.  

Sigurjón tekur við starfinu af Guðmundi Aðalsteinssyni, sem lét af störfum hjá fyrirtækinu í síðasta mánuði. Guðmundur hefur verið ráðinn í sambærilegt starf hjá Microsoft New Zealand og hann gegndi hjá Microsoft Ísland, og er hann nú þegar fluttur til Nýja Sjálands.