Íbúðahúsnæði hækkaði um 1,3%

Fermetraverð á íbúðahúsnæði á höfuðborgarsvæðinu hækkaði um 1,3% í september, samkvæmt mælingum Fasteignaskrár Íslands. Síðastliðna þrjá mánuði hefur hún hækkað um 1,5%, hækkunin síðastliðið hálft ár nemur 5,5% og síðastliðna tólf mánuði hefur hækkunin numið 7,3%.

Þetta sést með því að skoða vísitölu íbúðaverðs á höfuðborgarsvæðinu, en hún sýnir breytingar á vegnu meðaltali fermetraverðs. Íbúðarhúsnæði er skipt í flokka eftir stærð og hvort það telst fjölbýli eða sérbýli. Reiknað er meðalfermetraverð fyrir 9 flokka íbúðarhúsnæðis. Niðurstaðan er vegin með hlutdeild viðkomandi flokks í heildarverðmæti á markaði miðað við undangengna 24 mánuði.

Birtingu vísitölunnar er ætlað að varpa ljósi á þróun fasteignaverðs samkvæmt þeim gögnum sem liggja fyrir á hverjum tíma.