Ein öflugasta fréttastofa Íslands

Fréttastofa Stöðvar 2 hefur verið ein öflugusta fréttastofa landsins í 25 ár. Starfsemi Fréttastofunnar hefur breyst mikið á þessum aldarfjórðungi. Með tilkomu vefsins hefur þjónusta okkar við landsmenn aukist frá því þegar einungis voru fluttar fréttir einu sinni á dag á Stöð 2 og á klukkutímafresti yfir daginn á Bylgjunni. Í dag flytjum við landsmönnum stöðugar fréttir á frétta- og afþreyingarvef okkar Vísi, 365 daga ársins, auk reglulegra fréttatíma á Bylgjunni og Stöð 2.

Vefurinn hefur gjörbylt öllu fréttaumhverfi og nú birtast allar fréttir um leið og þær berast. Aðgengi að eldri fréttum hefur aldrei verið betra og á Vísi má nálgast fréttir okkar langt aftur í tímann. Hægt er að horfa eða hlusta á fréttatíma okkar á Stöð 2 og Bylgjunni í beinni útsendingu á Vísi bæði í tölvum og snjallsímum. Tækninni fleygir hratt fram og höfum við það að markmiði að vera í fremstu röð íslenskra fréttamiðla þegar kemur að tækninýjungum, hvort sem er í sjónvarpi, útvarpi, tölvum eða snjallsímum.

Á síðustu árum hefur áhorf á fréttirnar okkar og Ísland í dag aukist mikið samkvæmt rafrænum mælingum. Nú horfa að meðaltali í kringum 25% landsmanna á fréttatíma Stöðvar 2 og Ísland í dag. Yfir hundrað þúsund manns nota Vísi á hverjum degi og nánast hver einasti Íslendingur vikulega. Við flytjum fréttir á Bylgjunni á klukkutíma fresti allan daginn sem tugþúsundir landsmanna hlusta á. Vegna þeirrar miklu útbreiðslu sem við njótum í sjónvarpi, útvarpi og á vefnum má segja að staða Fréttastofu Stöðvar 2 hafi aldrei verið sterkari.

Stefna okkar er að vera fyrst með fréttirnar og njóta sérstöðu fyrir skýra og lifandi framsetningu frétta. Á fréttastofunni starfa um 60 metnaðarfullir einstaklingar með fjölbreytta menntun, þekkingu og reynslu. Fagfólk í fremstu röð sem hefur það að markmiði að flytja fólkinu í landinu traustar fréttir með ábyrgum hætti. Starfsfólk fréttastofunnar mun áfram þjóna sínu mikilvæga hlutverki að veita landsmönnum öllum fyrsta flokks fréttaþjónustu.