Rólegt í Leirvogsá

Sex laxar veiddust í Leirvogsá í gær. Veitt er til 20. september og vonandi verða síðustu dagarnir góðir þar sem rigning er nú á höfuðborgarsvæðinu.

Sumarið hefur verið býsna erfitt í Leirvogsá sökum vatnsþurrðar. Sem dæmi hafa gljúfrin á efsta svæðinu aðeins gefið einn lax í sumar og kom hann úr Kerfossi.

Þó er sumarveiðin með ágætum en 325 laxar hafa veiðst á stangirnar tvær sem leyfðar eru daglega.

Ljóst er að ganga laxa í Leirvogsá í sumar er með minna móti, og í fljótu bragði munar þar fjórðungi. Heildarfjöldi laxa í gegnum teljara hefur að meðaltali verið um eitt þúsund laxar, en fram til þessa hafa 750 laxar gengið teljarann.

Þess má geta að langstærstur hluti sumarveiðinar er tekinn neðan teljara, og ljóst að þeir laxar sem liggja í hyljum ofan teljara hafa verið erfiðir til töku í vatnsleysinu í sumar. Vonandi verður breyting þar á þessa síðustu daga tímabilsins.

Birt með góðfúslegu leyfi SVFR