Aron og félagar í AGF í annað sætið

AGF vann í dag góðan 2-0 útisigur á HB Köge í dönsku úrvalsdeildinni og kom sér þar með upp í annað sæti deildarinnar. Íslenskir knattspyrnumenn voru víða í eldlínunni í dag.

Þetta var fyrsti leikurinn í níundu umferð og er AGF með fimmtán stig, rétt eins og Álaborg sem á leik til góða eins og flest önnur lið í deildinni. FC Kaupmannahöfn virðist óstöðvandi en liðið hefur aðeins tapað tveimur stigum til þessa og er með sjö stiga forystu á toppi deildarinnar.

Aron Jóhannsson kom inn á sem varamaður í hálfleik en bæði mörk AGF voru skoruð af peter Graulund í fyrri hálfleik.

Í Svíþjóð tapaði Halmstad fyrir Kalmar á útivelli, 1-0. Jónas Guðni Sævarsson lék fyrstu 80 mínúturnar í liði Halmstad sem er í neðsta sæti sænsku úrvalsdeildarinnar með fjórtán stig - sjö stigum á eftir næsta liði.

Þá var einnig spilað í Belgíu í kvöld. Arnar Þór Viðarsson lék allan leikinn fyrir Cercle Brugge sem gerði markalaust jafntefli við Lierse í kvöld. Bróðir hans, Bjarni Þór, á við meiðsli að stríða og kom ekki við sögu er lið hans, Mechelen, steinlá fyrir Mons á útivelli, 5-1.

Jón Guðni Fjóluson sat sem fyrr á bekknum er Beerschot vann 2-0 sigur á Zulte-Waregem. Jón Guðni hefur ekkert fengið að spila í deildinni síðan hann kom til liðsins frá Fram fyrr í sumar.

Cercle Brugge er á toppi deildarinnar með fjórtán stig að loknum sjö leikjum. Mechelen er í áttunda sætinu með tíu stig en Beerschot í því tíunda með níu stig.