Metfjöldi farþega í einum mánuði

Aldrei hafa fleiri farþegar flogið með Iceland Express í einum mánuði en í júlí síðastliðnum, en tæplega 95 þúsund farþegar flugu með fyrirtækinu í mánuðinum. Það er 24 prósenta aukning á farþegafjölda frá sama mánuði í fyrra.

Fyrirtækið jók sætaframboð um rúm 20 prósent á þessu ári miðað við árið áður, enda fjölgaði farþegum félagsins á flesta áfangastaði auk þess sem fyrirtækið býður nú upp á flug til fleiri áfangastaða en gert var í fyrra. Sætanýting var um 85 prósent í júlí, sem er töluvert betri nýting en fyrir ári síðan.