Kraftur í vexti einkaneyslu á þriðja ársfjórðungi

Kröftugur vöxtur virðist ætla að vera í einkaneyslu á þriðja ársfjórðungi ársins ef marka má tölur um greiðslumiðlun. Í nýlega birtum tölum Seðlabankans um greiðslumiðlun kemur meðal annars fram að kreditkortavelta í júlí nam alls 29,1 milljarði kr., sem jafngildir 9% aukningu að raungildi milli ára.

Fjallað er um málið í Morgunkorni greiningar Íslandsbanka. Þar segir að í júlí var talsverður afgangur á kortajöfnuðinum, þ.e. kortanotkun útlendinga hér á landi að frádreginni kortanotkun Íslendinga erlendis. Nam afgangurinn 5,3 milljörðum kr., en í sama mánuði í fyrra var 4,9 milljarða kr. afgangur af kortajöfnuðinum. Allar líkur eru á að afgangur af kortajöfnuði verði verulegur á þriðja fjórðungi ársins.

Önnur vísbending um þróun einkaneyslunnar var birt síðastliðinn föstudag þegar Rannsóknarsetur verslunarinnar sendi frá sér smásöluvísitölu sína. Þar má sjá að í júlí var dágóður raunvöxtur í veltu með raftæki m.v. sama mánuð í fyrra, eða sem nemur 22,8% . Í húsgögnum var vöxturinn 7,5% og í dagvöru 1,4%. Í skóm var 1,4% vöxtur en 12,1% samdráttur hins vegar í fötum og 4,7% samdráttur í áfengi.

Tölurnar benda til þess að samsetning einkaneyslunnar sé að taka talsverðum breytingum nú þegar einkaneyslan er að taka við sér aftur.

Þriðju vísbendinguna um þróun einkaneyslu sendi Hagstofan frá sér í morgun. Var það magnvísitala fyrir innfluttar neysluvörur á fyrstu sex mánuðum ársins. Var vöxturinn 12,3% samanborið við sama tímabil í fyrra. Mestur var vöxturinn í ökutækjum til einkanota sem jukust um 65% á tímabilinu. Ferðamannaþjónustan á talsverðan hluta af þeim vexti þ.e. endurnýjun á bílaleigubílum.

Vöxtur var hins vegar einnig talsverður í öðrum neysluvörum, eða 6,7% og þar af 19,5% vöxtur í varanlegum neysluvörum á borð við raftæki og 6,1% vöxtur í innflutningi á mat og drykkjarvörum.