Seðlabankinn tapar milljörðum á Pandóruhruni

Seðlabanki Íslands gæti tapað allt að einum milljarði danskra kr. eða um 22 milljörðum kr. á hruni hlutabréfa í danska skartgripafyrirtækinu Pandóru í kauphöllinni í Kaupmannahöfn.

Þegar Seðlabankinn seldi FIH bankann s.l. haust var ákvæði í samningum þess efnis að Seðlabankinn gæti fengið aukalega allt að milljarð danskra kr. úr Axcel sjóðinum, sem FIH á hlut að, en stærsta eign þess sjóðs var meirihlutaeign í Pandóru. Síðan um áramót hafa hlutir í Pandóru hríðfallið eða um 80%. Í þessari viku hröpuðu þeir um 65% á einum degi.

Danskir fjölmiðlar greina frá því í morgun að tap FIH bankans á eignarhlut sínum í Axcel sé gríðarlegt. Uppsafnað frá áramótum nemur tapið rúmlega 860 milljónum danskra kr. eða um 19 milljörðum kr.

Í umfjöllun um málið á vefsíðunni finanswatch segir að núverandi eigendur FIH hafi ekki stórar áhyggjur af þessu tapi þar sem reikningurinn fyrir það verði sendur til Seðlabanka Íslands. Aðrir fjölmiðlar nefna á móti að þetta gífurlega tap gæti haft áhrif á eiginfjárstöðu FIH og gæti leitt til þess að áætlaður hagnaður bankans á þessu ári muni þurrkast út.