Algjör óvissa um endurheimtir Seðlabankans

Algjörlega óvíst er hvort tæplega helmingurinn af neyðarláni sem Seðlabankinn veitti Kaupþingi í miðju hruni, jafnvirði rúmlega fjörutíu milljarðar króna, fáist greiddur að fullu. Fyrir fjárhæðina mætti reisa tuttugu meðalstór fangelsi.

Gengið var frá sölu á danska bankanum FIH í september í fyrra en Seðlabanki Íslands var með veð í bankanum í heild sinni eftir 500 milljóna evra neyðarlán sem bankinn veitti Kaupþingi 6. október 2008. Lánið átti að greiða fjórum dögum síðar en síðan féll Kaupþing. Endurheimta á láninu er gífurlegt hagsmunamál fyrir íslenska ríkið og þar með fyrir íslenska skattgreiðendur.

Þegar gengið var frá sölunni á FIH bankanum til danskra lífeyrissjóða og sænskra fjárfesta fékk Seðlabankinn strax 255 milljónir evra í reiðufé, en afgangurinn af söluverðinu var skilyrtur. Um er að ræða 415 milljónir evra, jafnvirði 64 milljörðum króna en og er það þessi hluti kaupverðsins sem ákveðinn áhætta er tengd við. Því hann kann að lækka og mun lækka vegna þess taps sem FIH verður fyrir vegna eigna á efnahagsreikningnum frá 30. júní 2010 til 31. desember 2014. Salan um mun raungerast í lok árs 2014 og horfurnar fyrir FIH eru ekkert alltof æðislegar.

FIH hefur tapað á annan tug milljarða króna frá því í apríl vegna gengis í skartgripaframleiðandanum Pandóru sem er stærsta eign sjóðsins Axcel sem er á vegum FIH, eins og fréttastofan greindi frá í gær, en hrun á virði Pandórubréfanna hefur haft mikil áhrif á eignasafn FIH. Vandræði FiH eru hins vegar ekki aðeins tengd skartgripum því lánshæfismat FiH var sett í ruslflokk í mars síðastliðnum og lækkaði enn fyrr í sumar þegar matsfyrirtækið Moody's færði mat FIH niður og efast matsfyrirtækið um að danski bankinn ráði við endurfjármögnun lána á næstu tveimur árum en bankinn skuldar danska ríkinu um 1100 milljarða króna.