Íslenska krónan of hátt skráð samkvæmt Big Mac vísitölunni

Íslenska krónan er allt of hátt skráð gagnvart stórum erlendum gjaldmiðlum- allavega ef við tökum mið af Big Mac vísitölunni. Nærbuxnavísitalan bendir til að hagkerfið sé í kreppu, en sé þó að taka við sér.

Big Mac vísitalan fagnar í september 25 ára afmæli sínu, en breska vikublaðið The Economist hefur birt hana árlega síðan 1986. Vísitalan byggir á því að vara sem er einsleit sama hvar neytendur kaupa hana ætti samkvæmt lögmálum hagfræðinnar að kosta það sama um allan heim.

Vikublaðið ber því saman verðið á Big Mac hamborgara á milli landa, og ef mikill verðmunur er á borgaranum er það talið til marks um að gjaldmiðill annars landsins sé of hátt skráður gagnvart hinum.

Ísland datt auðvitað út úr vísitölunni þegar McDonalds fór úr landi, en fréttastofa svindlaði aðeins og reiknaði vísitöluna fyrir Ísland með því að nota verðið á Heimsborgaranum á Metro.

Samkvæmt niðurstöðu samanburðarins er íslenskra krónan of hátt skráð gagnvart helstu viðskiptamyntum landsins, ef frá er talin Norska krónan.

Hamborgarahagfræði af þessu tagi hefur alið af sér aðrar ofureinfaldar hagtölur sem gefa vísbendingar um ástand hagkerfisins. Alan Greenspan, fyrrverandi seðlabankastjóri Bandaríkjanna er til dæmis sagður hafa fylgst náið með sölutölum fyrir brækur, en þegar hagkerfið er í kreppu kaupa karlmenn sjaldnar á sig nærbuxur.

Á Íslandi féll nærbuxnasalan snarplega árin 2008 og 2009, en virðist nú vera að taka við sér. Enn er því von fyrir íslenska hagkerfið, allavega ef eitthvað er að marka nærbuxnavísitöluna.