Skuldakreppan gæti haft nokkur áhrif á íslenskt hagkerfi

Miklar skuldir vestrænna ríkja og kreppan sem fylgir þeim gætu haft nokkur áhrif á íslenskt hagkerfi. Líklegt er að þrýstingur komi á verð okkar helstu útflutningsvara, en verulegur hluti sjávarafurða og ferðaþjónustu okkar telst til munaðarvara. Með slíkar vörur hefur minnkun á eftirspurn allajafna mikil áhrif til verðlækkunar.

Þetta kemur fram í Markaðsfréttum Íslenskra verðbréfa. Þar segir að afgangur af vöru- og þjónustuviðskiptum við útlönd virðist vera að minnka hratt og mun verðlækkun útflutningsvara ekki bæta úr skák. Því er líklegra en ella að krónan þurfi að gefa meira eftir en orðið er frá áramótum til að auka á áður nefndan afgang til að hægt sé að standa undir erlendum skuldum hagkerfisins.

Óvissa með endurfjármögnun erlendra skulda hefur aukist undanfarið og vextir hafa farið hækkandi.