Gullforði Íslands hækkaði um milljarð í júlí

Gullforði Íslands hækkaði um milljarð kr. í júlímánuði. Verðmæti gullforðans nemur nú rétt rúmum 12 milljörðum kr.

Þetta kemur fram í efnahagsreikningi Seðlabankans sem birtur er reglulega á vefsíðu bankans. Gífurlegar hækkanir á heimsmarkaðsverði á gulli valda þessari hækkun á gullforðanum og óhætt er að segja að verðmæti hans hafi haldið áfram að aukast það sem af er þessum mánuði.

Í efnahagsreikningnum kemur fram að gjaldeyrisforði landsins nemur nú tæpum 855 milljörðum kr. og jókst hann um 27 milljarða kr. í júlí.  Nettóstaða forðans nemur nú um 184 milljörðum kr.

Af stórum hreyfingum á efnahagsreikningnum má nefna að í júlí lækkaði innstæðan á viðskiptareikningi ríkissjóðs um 57 milljarða kr. Eftir á reikningnum standa um 80 milljarðar kr.