Lífeyrissjóðir tapa tugum milljarða í hruninu

Íslensku lífeyrissjóðirnir hafa að öllum líkindum tapað tugum milljarða kr. á hruninu sem stendur yfir á helstu hlutabréfamörkuðum heimsins.

Erfitt er að gera sér nákvæma grein fyrir tapinu því miklar sveiflur hafa verið á mörkuðunum í morgun, einkum í Evrópu. Þar má nefna að FTSE vísitalan hefur sveiflast frá því að vera lítillega í plús og yfir í 5% í mínus. Þegar þetta er skrifað á hádegi er FTSE í mínus 0,3%.

Erlendar eignir lífeyrissjóðanna nema rúmum 470 milljörðum kr. og eru um fjórðungur af heildareignum þeirra. Hinar erlendu eignir eru einkum í hlutabréfum og þá hlutabréfasjóðum sem sveiflast eins og helstu hlutabréfavísitölur. Miðað við 6% rýrnun á þessari eign er tap lífeyrissjóðanna tæpir 30 milljarðar kr. Ef tekin er rýrnun upp á 15% sem er lækkun á stærstu vísitölunum undanfarnar tvær vikur er tap lífeyrisjóðanna hinsvegar 70 milljarðar kr.

Taka skal fram að þetta er gróflega áætlað m.v. stöðuna eins og hún er og gæti auðveldlega breyst til hins betra eða verra eftir því sem líður á vikuna eða mánuðinn.