Elliðaárnar fullar af laxi

Konurnar í hópnum Kastað til bata voru við veiðar í Elliðaánum í morgun og luku veiðum núna klukkan 13:00.  Það er óhætt að segja að veiðin hafi gengið vel því þær tóku kvótann og einhverja laxa í viðbót sem var sleppt aftur í ánna.

Það er mikið af laxi í Elliðaánum og sem dæmi má nefna að Sjávarfossinn var fullur af laxi, eins var mikið af laxi í Móhyljunum, Teljarastreng, Ullarfossi, Arbæjarhyl, Hundasteinum og Hrauni.  Líklega um 20-30 laxar á hverjum stað og allt er þetta blár og nýgengin lax.

Breytingin á kvótanum í ánni var umdeildur á sínum tíma, en þegar árnar voru í mikilli lægð var talað um þetta sem ögurstund fyrir stofninn í ánni.  Ef haldið yrði áfram á sömu braut yrði stofninn hreinlega veiddur upp!  Friðunin var tekin í þeim skrefum að kvótinn var minnkaður í nokkrum skrefum í þá tvo laxa sem hann er í dag.  Og ef þessi aukna laxgengd er afrakstur af því þá er engin ástæða til að breyta þessu aftur að margra mati.

Það er frekar spurning um að taka upp kvóta í fleiri ám.