Eignir heimilanna tæplega 3.500 milljarðar

Framtaldar eignir heimilanna námu 3.466 milljörðum króna í lok síðasta árs og höfðu þær dregist saman um 9% frá fyrra ári. Þá er ekki tekið tillit til endurmats eigna í tengslum við endurálagningu auðlegðarskatts.

Þetta kemur fram í tilkynningu frá ríkisskattstjóra. Fasteignir töldust 2.248 milljarðar kr. að verðmæti eða 64,9% af eignum en verðmæti þeirra hafði dregist saman um tæp 10% milli ára. Eigendum fasteigna fækkaði enn milli ára og nú um 1,7%.

Framtaldar skuldir heimil­anna námu alls 1.878 milljörðum króna í árslok 2010 og höfðu dregist saman um 0,8% milli ára. Framtaldar skuldir vegna íbúðar­kaupa stóðu því sem næst í stað og námu 1.151,6 milljörðum króna.

Skuldir vegna íbúðarkaupa nema nú í fyrsta sinn yfir helmingi af verðmæti fasteigna í eigu einstaklinga. Þrátt fyrir það telja um 26 þúsund af 95 þúsund fjölskyldum sem eiga íbúðarhúsnæði ekki fram neinar skuldir vegna kaupa á því.

Útvarpsgjald nemur 3,2 milljörðum króna. Það er 17.900 kr. á hvern framteljanda á aldrinum 16-69 ára sem greiðir tekjuskatt. Greiðendum útvarpsgjalds fækkar um rúmlega 3.600 milli ára. Gjald í framkvæmdasjóð aldraðra nemur 1,5 milljarði króna og leggst á sama hóp framteljenda.