Tveir starfsmenn þurfa að greiða þrotabúi Kaupþings milljónir

Héraðsdómur Reykjaness dæmdi í dag tvo fyrrverandi starfsmenn Kaupþings, karlmann og konu, til að greiða þrotabúi Kaupþings um sex milljónir króna, hvor fyrir sig.

Eins og fram hefur komið felldi Kaupþing banki niður persónulegar ábyrgðir starfsmanna sem höfðu fengið lán fyrir kaupum á hlutabréfum í bankanum rétt áður en bankinn hrundi haustið 2008.

Slitastjórn Kaupþings rifti þessum gjörningi stjórnenda fyrrverandi Kaupþings og stefndi starfsmönnum bankans til greiðslu, annars vegar á 6,5 milljónum króna og hins vegar 6,2 milljónir króna. Áður hafa fallið dómar í sambærilegum málum, en alls fengu um 80 starfsmenn lán.

Starfsmennirnir sem dæmdir voru í dag voru annars vegar forstöðumaður viðskiptaumsjónar í bankanum og hins vegar starfsmaður viðskiptaumsjónadeildar.