Sex vilja byggja hótel við Hörpu

Í dag rann út frestur til að skila tilboði í byggingarreitinn vestan við Hörpu, tónlistar- og ráðstefnuhúsið í miðborg Reykjavíkur. Um var að ræða opið söluferli af hálfu eiganda lóðarinnar, eignarhaldsfélagsins Situsar, sem kynnt var fyrir erlendum og innlendum fjárfestum. Tugir fyrirspurna komu frá áhugasömum fjárfestum en á endanum bárust sex formleg tilboð í byggingarréttinn á lóðinni, þrjú eru frá íslenskum aðilum og þrjú frá erlendum aðilum.

Áskilið var í útboðsgögnunum að viðkomandi hyggi á byggingu hótels á reitnum í samvinnu við alþjóðlega hótelkeðju. Gert er ráð fyrir að stærð hótelsins verði í hið minnsta 250 herbergi og að það verði 4 eða 5 stjörnur á alþjóðlegan mælikvarða. Á reitnum má byggja að hámarki 28.000 m2 ofanjarðar og 2.000 m2 bílakjallara.

Hótelrekstur hefjist vorið 2015

Vinna er nú hafin við að fara yfir tilboðin sem bárust. Í kjölfar þess verður efnt til nánari viðræðna við þá tilboðsgjafa sem vænlegastir þykja. Markmið stjórnenda Situsar er að hótelrekstur verði hafinn á reitnum í seinasta lagi  vorið 2015. Endanleg niðurstaða um hverjir byggi hótelið mun liggja fyrir innan fjögurra til sex vikna.

Fram kemur í tilkynningu að jelstu kostirnir við reksturs hótels á þessum reit eru taldir vera staðsetning við sjóinn og miðborgina. „Ferðaþjónusta er ört vaxandi atvinnugrein á Íslandi og nálægðin við Hörpu og ráðstefnusali hennar er talin skapa möguleika að ná til nýrra hópa ferðamanna sem sækja muni fundi, ráðstefnur og menningarviðburði í Hörpu – að miklu leyti utan hefðbundins háannatíma.“

Markmið Situsar ehf. með útboðinu er að tryggja að við hlið Hörpu rísi hótel af þeim gæðum sem hæfir tónlistar- og ráðstefnuhúsinu og þannig að gott samspil verði á milli starfseminnar í þessum tveimur byggingum.