Ágúst Torfi Hauksson ráðinn forstjóri Norðurorku

Ágúst Torfi Hauksson hefur verið ráðinn forstjóri Norðurorku hf. Ágúst er 37 ára vélaverkfræðingur og lauk mastersnámi við University of British Columbia í Kanada árið 2001.

Í tilkynningu segir að Ágúst hafi stundað rannsóknir í varmafræðum við University of British Columbia og unnið hjá verkfræðistofu VGK, m.a við verkefni tengd orkuvinnslu og -nýtingu. Frá árinu 2005 hefur Ágúst verið framkvæmdastjóri hjá Brim hf. þar sem hann hefur m.a. stýrt starfsemi félagsins við Eyjafjörð þar sem um 150 manns starfa að meðaltali.

Ágúst er kvæntur Evu Hlín Dereksdóttur verkfræðingi og eiga þau tvær dætur. Hann hefur störf sem forstjóri Norðurorku í september.