Þjóðhagsspá: Landsframleiðslan aukist um 3,1 prósent á næsta ári

Gert er ráð fyrir að landsframleiðsla aukist um 2,5 prósent á þessu ári og 3,1 prósent á því næsta. Þetta kemur fram í þjóðhagsspá Hagstofu Íslands sem kemur út í dag. Spáin nær til ársins 2016. Gert er ráð fyrir að einkaneysla og fjárfestingar aukist á þessu ári og næstu ár. Samneysla dróst hinsvegar saman á þessu ári um 2,6 prósent en búist er við að hún taki við sér að nýju árið 2014.

Á heimasíðu Hagstofunnar segir að vöxtur landsframleiðslu á spátímabilinu verði knúin áfram af aukinni einkaneyslu og fjárfestingu enda þótt samneysla dragist saman nú og á næsta ári. „Ekki er gert ráð fyrir að gengi krónunnar styrkist mikið á næstu árum en það stuðlar áfram að afgangi í vöru- og þjónustuviðskiptum.“

„Verðbólga á fyrri hluta þessa árs hefur verið nokkru meiri en áður var reiknað með og laun hækkað meira og fyrr en áður var spáð,“ segir ennfremur.  „Verðbólga verður því hærri 2011 og 2012 en gert var ráð fyrir í fyrri spám en verður eftir það í samræmi við verðbólgumarkmið Seðlabankans. Reiknað er með að atvinnuleysi verði áfram nokkuð hátt en lækki stöðugt með auknum hagvexti.“

Hagstofan gaf síðast út þjóðhagsspá 4. apríl síðastliðinn og er ráðgert að gefa út næstu spá í nóvember.