Ákærður fyrir stórfelld umboðssvik

Efnahagsbrotadeild ríkislögreglustjóra hefur ákært Viggó Þórisson, fyrrverandi framkvæmdastjóra Verðbréfaþjónustu Sparisjóðanna, fyrir stófelld umboðssvik.

Ákæran var gefin út hinn 9. júní síðastliðinn en fjögur ár eru frá því rannsókn málsins hófst vegna gruns um stórfelld efnahagsbrot Viggós meðan hann var framkvæmdastjóri Verðbréfaþjónustu Sparisjóðanna. Brotin voru talin felast í útgáfu tilhæfulausrar ábyrgðaryfirlýsingar upp á 200 milljónir Bandaríkjadala, jafnvirði 22 milljarða króna.

Grunur leikur á að Viggó hafi misnotað aðstöðu sína hjá Verðbréfaþjónustu Sparisjóðanna og falsað eða rangfært skjöl sem beri það sem sér að eiga að stafa frá fyrirtækinu en í þessum skölum sé vísað til viðskipta sem ekki sé nokkur fótur fyrir að hafi átt sér stað á vegum félagsins. Umboðssvikin eru talin felast í því að ef ábyrgðin hefði verið nýtt hefði það valdið fyrirtækinu miklu tjóni. Það gerðist hins vegar ekki.

Málið þótti afar umfangsmikið og teygir anga sína til sex landa; Bretlands, Bandaríkjanna, Filippseyja, Kanada, Grenada og Austurríkis.

Viggó var gert að sæta farbanni eftir að málið kom upp frá 13. apríl 2007, alls í tæplega 23 mánuði og komu úrskurðir þar að lútandi til kasta Hæstaréttar alls 12 sinnum. Í mars 2009 felldi Hæstiréttur farbannið úr gildi og í niðurstöðunni er dráttur á rannsókn málsins gagnrýndur.

Samkvæmt almennum hegningarlögum geta umboðssvik varðað allt að sex ára fangelsi ef sakir eru miklar, en Viggó er ákærður til vara fyrir tilraun til fjársvika.

Sveinn Andri Sveinsson, verjandi Viggós, sagði við fréttastofu í dag að ákæran hefði ekki verið birt honum og því lægi ekki fyrir hvenær málið yrði þingfest. Sveinn sagði að umbjóðandi hans myndi neita sök í málinu enda teldi hann sig engin brot hafa framið.

Þá sagði Sveinn drátt á rannsókn málsins afar óeðlilegan enda hefði málið nú verið til rannsóknar í fjögur ár.