Forstjóri Húsamiðjunnar segir ómaklega vegið að fyrirtækinu

Forstjóri Húsasmiðjunnar segir ómaklega vegið að fyrirtækinu í fréttatilkynningu frá BYKO frá því í gær. Þar var greint frá uppsögnum og lokun einnar stærstu verslunar BYKO samstæðunnar. Í tilkynningunni segir að aðstæður í íslensku efnahagsumhverfi hafi í langan tíma verið slæmar með tilheyrandi samdrætti í verslun með byggingarvörur. „Þá hafa samkeppnisaðstæður á þeim markaði gjörbreyst með eignarhaldi og afskriftum banka á skuldum og síðar yfirtöku lífeyrissjóða á einu þeirra fyrirtækja sem starfrækt er á þessu sviði."

Sigurður Arnar Sigurðsson, forstjóri Húsasmiðjunnar segir að hér sé augljóslega átt við Húsasmiðjuna sem nú er í eigu Framtakssjóðs Íslands. Sigurður segir að Húsasmiðjan hafi frá hruni íslenska bankakerfisins ráðist í gríðarlega umfangsmiklar og sársaukafullar aðgerðir til að bæta reksturinn. „Rekstrarkostnaður félagsins hefur dregist saman um 35% og starfsmönnum verið fækkað um allt að 50%. Flestir núverandi starfsmenn, að meðtöldum öllum lykilstjórnendum, hafa tekið á sig launaskerðingu til þess að leggja sitt af mörkum. Þannig hafa starfsmenn og stjórnendur lagt sig fram um að hagræða á öllum sviðum og vænta þeir viðunandi afkomu með auknum hagvexti og framkvæmdum í landinu á komandi tíð.“

Forstjórinn segir að frá því Framtakssjóður Íslands eignaðist Húsasmiðjuna hafi fyrirtækið ekki notið neinnar fjárhagslegrar aðstoðar frá eigendum sínum enda gangi áætlanir út á að fyrirtækið eflist á eigin verðleikum í heilbrigðri samkeppni. „Þannig býr Húsasmiðjan við nákvæmlega sömu skilyrði og önnur fyrirtæki landsins en eins og allir vita eru mörg þeirra í gjörgæslu bankanna,“ segir Sigurður.