Þeir sem voru í Spkef geta nýtt sér úrræði Landsbankans

Að gefnu tilefni vill Landsbankinn taka fram að þeir viðskiptavinir bankans sem áður voru í  viðskiptum við Spkef, njóta sömu réttinda og aðrir þegar kemur að nýtingu þeirra leiða sem bankinn kynnti 26.maí til lækkunar skulda. Þetta kemur fram í tilkynningu frá bankanum.

Þar segir ennfremur:

Nýjar leiðir Landsbankans til að lækka skuldir einstaklinga snerta með einhverjum hætti um 60.000 viðskiptavini en hafa veruleg áhrif á stöðu um það bil 30.000. Skuldir viðskiptavina bankans verða lækkaðar um upphæð sem nemur á bilinu 25 – 30 milljörðum króna.

Leiðirnar eru þrjár, lækkun fasteignaskulda í 110% af fasteignamati, endurgreiðsla vaxta til skilvísra viðskiptavina og niðurfelling ýmissa annarra skulda sem eru umfram greiðslugetu miðað við greiðslumat.

Landsbankinn hvetur þá viðskiptavini sem eru í greiðslu- og/eða skuldavanda og nýverið eru byrjaðir í viðskiptum við bankann, til að hafa samband og kanna hvaða  leiðir bankans henta þeim.

Ekki þarf að sækja um 110% leið eða endurgreiðslu vaxta, en sækja þarf um lækkun annarra skulda fyrir 15. júlí.

Hægt er að nálgast allar nánari upplýsingar á vef  bankans, landsbankinn.is eða í næsta útibúi.