Ótrúlega gott ástand á Laxárurriðanum

Vanir veiðimenn við Laxá í Mývatnssveit hafa sjaldan séð urriðann jafn vel haldinn og nú. Sannkölluð stórfiskaveiði hefur verið fyrstu dagana og veiddust 100 fyrsta daginn!

Spár veiðimann um gott sumar í Laxárdal og Mývatnssveit virðast ætla að rætast.

Þrátt fyrir ömurlegar aðstæður fyrstu dagana hefur nú hlýnað fyrir norðan og mildara veður tekið við.

Hefðbundnar veiðisögur berast nú úr Mývatnssveit. Fimmtán stórfiskar voru teknir úr Brotaflóa í morgun og tíu stórurriðar á bilinu fimm til sjö pund voru teknir á flotlínu og straumflugur úr Geirastaðaskurði.

Að sögn veiðimanna er urriðinn í ótrúlega góðu ásigkomulagi. Til að mynda veiddist í gær 55cm urriði sem var gersamlega hnöttóttur og vóg 3.3 kíló? Að mestu er um að ræða urriða frá 50-64cm.

Nú er hitastig um átta gráður og logn í Mývatnssveitinni.

Það er því veisla framundan hjá veiðimönnum. Við bendum á lausar stangir í Laxárdal næstu daga, auk þess sem að örfáar júnístangir eru eftir í Mývatnssveitinni. Veiðileyfin eru aðgengileg í vefsölunni hjá SVFR

Birt með góðfúslegu leyfi SVFR