Íslenska gámafélagið og Vinnuföt Fyrirtæki ársins

Íslenska gámafélagið og Vinnuföt eru Fyrirtæki ársins 2011 samkvæmt niðurstöðum könnunar VR, það fyrra í hópi stærri fyrirtækja (50 starfsmenn eða fleiri) en það síðara í hópi minni fyrirtækja (49 starfsmenn eða færri). Hjá báðum fyrirtækjunum er það helst starfsandi og stolt af vinnustaðnum sem nefnt er til sögunnar og einnig sjálfstæði í starfi.

Þetta er annað árið í röð sem Íslenska gámafélagið nýtur þessa eftirsótta heiðurs. Nýherji er það fyrirtæki í hópi stærri fyrirtækja sem bætti sig mest á milli ára og er nú í 17. sæti. Í hópi minni fyrirtækja er Dynjandi hástökkvarinn og stekkur upp í 56. sæti.

Þetta er í fimmtánda skipti sem VR velur Fyrirtæki ársins og hefur könnunin fest sig í sessi sem sá mælikvarði sem helst er horft til þegar aðbúnaður og starfsánægja er metinn. Fjölmörg fyrirtæki setja sér árlega markmið um að ná ofar á listann.

Ríflega 21 þúsund félagsmenn VR fengu könnunina senda. Til viðbótar fengu ríflega tvö þúsund aðrir starfsmenn í rúmlega 70 fyrirtækjum senda könnun en forsvarsmenn þessara fyrirtækja buðu öllum starfsmönnum þátttöku, óháð því í hvaða stéttarfélagi þeir voru. Eins og síðustu ár þá var könnunin nú gerð í samstarfi við SFR stéttarfélag, sem velur Stofnun ársins. Náði hún því alls til um 44.000 félagsmanna. Þetta er langstærsta vinnumarkaðskönnun sem framkvæmd er hérlendis.

Fyrirtækjum í könnuninni er skipt í tvo hópa, stærri fyrirtæki þar sem starfa 50 eða fleiri starfsmenn og minni fyrirtæki en þar eru starfsmenn 49 eða færri.

Niðurstöðum könnunarinnar er skipt í átta lykilþætti. Þessir þættir eru: trúverðugleiki stjórnenda, launakjör, vinnuskilyrði, sveigjanleiki vinnu, sjálfstæði í starfi, ímynd, ánægja og stolt og starfsandi. Hverjum þætti er gefin einkunn á bilinu einn til fimm og saman mynda þær heildareinkunn fyrirtækisins.

Af þáttunum átta er meðaltalið hæst fyrir sveigjanleika vinnu og sjálfstæði í starfi. Meðaleinkunn stærri fyrirtækja er lægri fyrir alla þætti en meðaleinkunn minni fyrirtækja. Almennt er þróunin í neikvæða átt frá því í könnuninni fyrir ári. Mest lækkar ánægjan með launakjör og einnig ánægja og stolt. Aðrir þættir lækka minna eða standa í stað.

Könnunin var gerð í febrúar og mars á þessu ári og sá Capacent um framkvæmd og úrvinnslu. Svarhlutfall var 48% sem er nokkuð lægra en í fyrra en þá var það 54% Um 90% svarenda fengu senda rafræna könnun og var mikill meirihluti svara, eða 98%, rafræn. Svörun á netinu var mun betri en hjá þeim sem svöruðu prentuðum eintökum eða 53%.