Hanna Birna: Meirihlutinn ræður ekki við þetta stóra verkefni

Borgarfulltrúar Sjálfstæðisflokksins segja að rúmlega 14 milljarða rekstrarafgangur borgarsjóðs fyrir árið 2010 endurspegli góðan rekstrarárangur sem byggi á síðustu fjárhagsáætlun og vinnu fyrri meirihluta undir forystu Sjálfstæðisflokksins.

Borgarfulltrúarnir segja að ekki hafi þurft að grípa til þeirra gjaldskrár- og skattahækkana sem núverandi meirihluti ákvað um síðustu mánaðarmót. Eins kom fram á Vísi fyrir í dag var tæplega 1,5 milljarða afgangur á rekstri borgarsjóðs og tæplega 13,7 milljarða hagnaður hjá samstæðu Reykjavíkurborgar.

Hanna Birna Kristjánsdóttir, fulltrúi sjálfstæðismanna í borgarstjórn, segir í tilkynningu að sú aðgerðaáætlun og vinna sem Sjálfstæðisflokkurinn setti af stað í kjölfar efnahagshrunsins árið 2008 er enn að skila sér í jákvæðri rekstrarniðurstöðu ársreiknings 2010. „Niðurstaðan af síðustu fjárhagsáætlun fyrri meirihluta er afar góð og hrekur málflutning núverandi meirihluta um svo erfiða stöðu að umfangsmiklar skatta- og gjaldskrárhækkanir séu óumflýjanlegar, samhliða illa ígrunduðum skólasameiningum í viðkvæmustu þjónustu borgarinnar."

Hún segir að ársreikningurinn fyrir árið 2010 sýni þvert á móti að að nú líkt og undanfarin ár sé hægt að standa með íbúm við erfiðar aðstæður og standa vörð um grunnþjónustuna, án þess að hækka alla skatta og gjöld. „Meirihlutinn hefur hins vegar hvorki haft vilja né getur til að fara þessa farsælu leið, heldur kýs leið ríkisstjórnarinnar og forgangsraðar markvisst í þágu kerfisins á kostnað fólksins,"  segir Hanna Birna.

„Þessi ársreikningur staðfestir að með því að gjörbreyta þeirri stefnu sem fyrri borgarstjórn fylgdi og hefur ítrekað skilað borgarsjóði og borgarbúum miklum árangri, hefur núverandi meirihluti tekið ranga ákvörðun.  Borgarsjóður hefur alla burði til að leyfa borgarbúum að njóta árangurs þessa aðhalds eins og við gerðum á sínum tíma í stað þess að halda því að íbúum að verkefnið sé svo erfitt að það þurfi stöðugt að láta þá greiða meira bæði í formi hærri skatta og gjalda, en einnig með því að valda óvissu og uppnámi í kringum viðkvæmustu grunnþjónustu borgarinnar. Það er vond þróun og ber vott um að meirihlutinn ræður ekki við þetta stóra verkefni."