Reyndu að smygla 60 kílóum af Khat úr landi

Fjórir karlar hafa verið úrskurðaðir í gæsluvarðhald til 31. maí að kröfu lögreglunnar á höfuðborgarsvæðinu.

Mennirnir, sem voru handteknir á gistiheimili í Reykjavík í fyrradag, eru grunaðir um aðild að innflutningi á tæplega 60 kíló af fíkniefnum, sem lögreglan hefur haldlagt. Um er að ræða fíkniefni sem nefnist khat og er afurð plöntu frá Norðaustur Afríku.

Fjórmenningarnir, sem nú eru í haldi lögreglu, eru allir erlendir ríkisborgarar. Tveir þeirra eru um fertugt, einn um fimmtugt og sá fjórði er hálfsextugur.

Fíkniefnin fundust við tollskoðun þegar senda átti þau úr landi til Kanada og Bandaríkjanna. Talið er að þeim hafi verið pakkað inn hér en ekki hafi verið ætlunin að koma þeim á markað á Íslandi, sem þó virðist hafa verið einhverskonar viðkomustaður á leið með fíkniefnin frá Evrópu og vestur um haf.

Eftir fyrrnefnda tollskoðun hófst frekari eftirgrennslan sem leiddi til þess að íslensk tollyfirvöld sendu beiðni til Frakklands og óskuðu eftir því að ákveðin sending frá Íslandi yrði kyrrsett þar ytra.

Við því var orðið en sendingin innihélt sama efni, þ.e. khat, en um ámóta magn var að ræða og hér var haldlagt. Ekki er ósennilegt að málin tengist.

Þetta er í annað sinn sem khat er haldlagt á Íslandi en síðasta sumar fundust nokkrir tugir kílóa af efninu í öðru lögregluumdæmi.

Tollgæslan stöðvaði einnig smyglara í ágúst á síðasta ári með sama efni. Þá reyndu þeir að smygla á fjórða tug kílóa slíkra efna til Kanada.